Ia urtebete egin du Hipoteka-zordunen babesa, zorraren berregituratzea eta alokairu soziala indartzeko neurriei buruzko maiatzaren 14ko 1/2013 Legeak, banketxeek ematen zituzten hipoteketako abusuzko klausulen inguruan Europako Justizia Auzitegiak emandako epaiaren ondoren gobernu zentralak bultzatu zuen legeak, alegia. Halaber, ia urtebete da finantza-erakundeek jardunbide onen kodea (JOK) martxan jarri zutela.
Ekonomia eta Lehiakortasun Ministerioak 2014ko apirilaren 15ean argitara emandako prentsa-ohar baten arabera, 2013ko azken hiruhilekoan 4.523 eskaera jaso ziren, ohiko etxebizitzen hipoteka-zorrak berregituratzeko JOKa aplika dadin. Eskaera horietatik 1.227tan, ordaindu gabeko zorra negoziatu zen, eta 397tan, etxebizitza ordainean ematea erabaki zen.
Gogoan izan behar da JOKaren baldintzak zorrotz samarrak zirela eta iragazki estua pasatu beharra zegoela kode hori erabiltzeko (ikusi blog-eko artikulua:etxebizitza.blog.euskadi.eus/eu/2013/06/04/aprobada-la-nueva-ley-hipotecaria/). Gainera, legea aldatu eta urtebetera, 82.000tik gora hipoteka-betearazpen gauzatu ziren 2013an (Botere Judizialaren Kontseilu Nagusiaren datuak).
Bestalde, utzarazpenen drama neurri batean arintzeko asmoz gobernu zentralak sortu zuen Etxebizitzen Gizarte Funtsak ere oso baldintza murriztaileak ezartzen ditu banketxeek emandako etxebizitzak okupatu ahal izateko eta, funts horrek martxan daraman lehenengo urtean, erabilgarri zeuden 5.891 etxebizitzetatik 637 esleitu dira eta 410 kontratu formalizatu dira.
Beraz, itxuraz behintzat, oso kopuru apalak dira gizarte-bazterketaren atarian dauden egoerei aurre egiteko.
Orain, gobernuak berak adierazi du zenbait murriztapen aldatu eta baldintzak arindu beharko dituela jendeak funtseko etxebizitzak eskuratu ahal izateko.
Oraindik ez dakigu ezer eta ezin da ezer iragarri, baina argi samar dagoena da beharrezkoa dela egitura-neurriekin asmatzea.
Informazio gehiago, hemen:
http://www.20minutos.es/noticia/2108900/0/de-guindos/acceso-vivienda/vivienda-fondo-social/
