2011n marka negatibo guztiak hautsi dira hasitako etxebizitzei, salmentei eta emandako hipotekei dagokienean.
INEk argitaratutako txosten baten arabera, prezioak ere ikaragarri jaitsi dira, eta denak harrituta utzi ditu; izan ere, azken hiruhilekoan, etxebizitzen balioa % 11 baino gehiago jaitsi zen, urtebete lehenagoko datuekiko.
Burbuila lehertu zenetik izandako jaitsierarik handiena izan da, 1996tik 2006ra bitartean etxebizitzaren balioak % 160 egin baitzuen gora, eta geroztik, % 20 baino ez baita jaitsi.
Euskal Autonomia Erkidegoaren kasuan, jaitsiera batez bestekoaren gainetik dago, % 12 baino gehiago jaitsi baita; eta gurearen antzera dabiltza: Madril (% 15), Errioxa eta Katalunia (% 14), eta Aragoi (% 12).
Hiri-lurzoruari dagokionean, hor ere, joera beherakoa izan da 2011; baina etxebizitzaren prezioa baino askoz ere nabarmenagoa gainera, 1.000 biztanle baino gutxiagoko udalerrietan % 35 jaitsi baitzen 2010eko datuekiko. Horren atzetik, 50.000 biztanle baino gehiagoko udalerrietako prezioetan izan zen jaitsierarik handiena, % 29 inguru.
Autonomia erkidegoei erreparatuz gero, Euskadi da lurzoruaren prezioan jaitsierarik handienetakoa nozitu duena, % 25; bik baino ez dute gainditu: Cantabriak (% 38) eta Errioxak (% 41). Gainera, lurzoruen salmentari dagokionean ere, Euskal Autonomia Erkidegoan izan zen jaitsierarik aipagarrienetakoa, 2011n aurreko urtearekin alderatuta % 40 erori baitzen.
Informazio gehiago nahi izanez gero:
